“Çernobıl qəzasının ləğvində iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında” qanunda əlilliyin müəyyən edilməsi qaydalarına dəyişiklik təklif olunur.
Insanhuquqlari.Az-ın məlumatına görə, layihəyə əsasən, “I dərəcə əlilliyi olan şəxslərə və ya sağlamlıq imkanları məhdud uşaqlara” sözləri “orqanizmin funksiyalarının 81-100 faiz itirilməsinə görə əlilliyi müəyyən edilmiş şəxslərə” sözləri ilə əvəz edilir.
“II dərəcə əlilliyi olan şəxslərə və ya sağlamlıq imkanları məhdud uşaqlara” sözləri isə “orqanizmin funksiyalarının 61-80 faiz itirilməsinə görə əlilliyi müəyyən edilmiş şəxslərə” sözləri ilə əvəzlənir.
“III dərəcə əlilliyi olan şəxslərə və ya sağlamlıq imkanları məhdud uşaqlara” sözləri “orqanizmin funksiyalarının 31-60 faiz itirilməsinə görə əlilliyi müəyyən edilmiş şəxslərə” sözləri ilə əvəzlənməsi təklif olunur.
Layihə parlamentin növbədənkənar sessiyalarında müzakirəyə çıxarılacaq.
